ليه مش قادره انساه ؟؟؟

ليه مش قادره انساه ؟؟؟

******** 

بقلم / إيمى الاشقر 

لكل بنت حبت اوى شاب من خلال الفيسبوك

وبعد ما حبته اوى وتعلقت بيه اوى اوى

وبقى شىء اساسى فى حياتها بعد عنها فجأة او اتغير فجأة او انتهت العلاقة باى طريقة كانت ..

احب اقولها انتِ حبتيه اوى لانك اتعودتى على وجوده ...

لانه على علم بكل تفاصيل

حياتك وخط سيرك بشكل يومى

ومعاكِ فى كل لحظة بتعشيها يعنى ...  لما ترجعى طمنينى عليكى ,

لما تطلعى من الامتحان طمنينى عملتى ايه ,

قبل ما تنامى رنى لى , وانتِ خارجه ولما ترجعى رنى لى على الموبيل

عشان اطمن عليكى ...

انا رايح الامتحان ادعى لى يا حبيبتى

انا رجعت من الامتحان اول حاجة فكرت اعملها انى اطمنك عليا

انا مسافر ادعى لى اوصل بالسلامة

انا رجعت من السفر واول حاجة فكرت فيها اطمنك عليا واسمع صوتك قبل ما انام

انا هنام تصبحى على خير

انا عايز اصحى الساعة 6

طيب ارن عليك يا حبيبى اصحيك ....

حاسس انك مضايقه يا حبيبتى احكى لى

وازاى عرفت انى مضايقه ؟

شوفتى ؟ عرفتى ؟ انى بحس بيكى من غير ما تتكلمى .....

 وكدا يعنى ......

بالاضافه انها اتعودت تفضفض معه وهو كمان .....

وبقى هو الصدر الحنين اللى بتترمى عليه لما حد يزعلها وهو طبعا

بيطبطب ومش بيتاخر ابدا ولا بيقصر ....

وبالطريقة دى اصبح موجود معها طول الوقت وحاسس بيها دايما

ومحتويها بقلبه الكبير عن بعد !

وبالطريقة دى اصبح هو موجود فى كل تفاصيل حياتها

وهى مشغوله بكل حاجة تخصه وعلى علم بكل حاجة فى حياته ومن هنا بدات تحس انها مرتبطه بيه وهو بتاعها هى وبس

ولما يتقدم لها عريس تبدا تحس انها بتموت

احساس بشع جدااا ان واحدة تكون فى حضن الانسان الوحيد اللى بيحس بيها

ويحتويها ويخدوها من حضنه وتروح مع واحد غريب عنها مافيش بينهم وبين بعض اى احساس ابداااا فعلا احساس اصعب من الموت دا اللى اسمه الموت بالحيا

ولما تحب البنت تخرج من المازق دا وتحكى لحبيبها على اللى حصل وانها حزينه عشان جالها عريس وهى بتحبه هو ....

او حتى لو رفضت فعلا العريس عشانه بس بتقوله

عشان تحركه ولو بيبحها فعلا ياخد خطوة ويتقدم رسمى ..

هنا تبدا تبان حقيقة العلاقة وحقيقة المشاعر ...

وطبعا بيقول لها ...

انا بحبك وهفضل احبك لكن انا مش مستعد للزواج دلوقتى , اهلى مش هيوفقوا لاى سبب من الاسباب مثلا , وافقى يا حبيبتى

انا عشان بحبك عايز مصلحتك وينهى معها العلاقة بطريقة شيك ورومانسية وعاطفية جداااااااااااااااا فهى تتعذب جداااااا جدااااااااااااااا وتحس بالموت اكتررررر

ومن هنا تنتهى العلاقة ويخرج من حياتها حتى لو ماكنش فى عريس ولا حاجة وهى بتقوله كدا عشان لو عايز يتقدم يتحرك ....

هى كدا فهمت انه مش ناوى يتقدم ولا ناوى يتجوزها لانه عنده اسباب زى ما وهمها ......

او ممكن يخرج من حياتها وينهى العلاقة فجأة بدون اسباب

او يختفى فجأة

او يبعد عنها ويتغير بدون سبب ...

يعنى بيخرج من حياتها باى شكل من الاشكال ...

من هنا نقدر نقول ان السبب فى انكِ مش قادره تنسيه هو ...

اولا :

اسلوبه العاطفى فى نهاية العلاقة خلاكى تعتقدى انه بيحبك فعلا

وهيضحى بنفسه وبحبه عشان انتِ تكونى سعيدة ومستقره فى حياتك الجديدة

ولكن الحقيقة انه كان اسلوب ذكى عشان يخلع مش اكتر من كدا بس حب يبان كبير وقلبه عليكى مش اكتر وبيحبك اكتر من نفسه وهيفضل فاكرك اكيد

ثانيا :

انتِ مش قادره تصدقى ان كل الحب والحنان والاحتواء اللى لقتيهم معه

كان مجرد تمثيل ومش قادره تتخيلى ان الشخصية الجميلة اللى اتعلقتى بيها

كانت مجرد حالة تقمص من باب الغش مش اكتر

ثالثا :

لسه فاكراه لان غرورك بيهىء لك انه هيلف هيلف ويرجع تانى

لانه بمجرد انه يعرف واحدة تانيه طبعا هيكتشف انك انتِ الاحسن

فيسبها ويرجع لك تانى على طول .. للاسف اللى بيتسلى بمشاعر الناس

عشان يرضى غروره مش بيبص وراه بيبص قدامه عشان يشوف الفريسه الجديدة وبعدين هو حقق هدفه وارضى غروره على حسابكِ وخلاص فهيرجع تانى ليه ؟

رابعا :

طول الوقت شاغله تفكيرك بيه وبتصرفاته اللى كان بيعملها معاكى

ودايما مركزه اوى فى الذكريات , زى انهرضه قالى كذا , .... وهكذا

مافيش داعى تركزى اوى مع ذكرياتكم وتعيشى حالة من الحنين لان الحنين بيولد الشوق والشوق لشىء مالهوش وجود شىء صعب جداااااااااااااااا

بس ركزى فى حاجة واحدة بس كل ما الذكريات تيجى على بالك او

تفتكرى حاجة حلوة منه .. ان كل حاجة منه كانت تمثيل , كان بيتسلى بمشاعرك

كان بيرضى رغباته وشهواته على حسابك , كانت اى حاجة غير الحب

لان يا حبيبتى اللى بيحب بجد بيعمل المستحيل ومش بيسيب حبيبته تروح منه ابدااا

وعشان كدا كل ما تيجى على بالك حاجة حلوة منه وتحسى بالحنين له على طول حطى قصدها حاجة واحدة بس ... كله كان كذب كله كان تمثيل

خامسا :

مش قادره تنسيه وطول الوقت بتفكرى فيه

لانك طول الوقت مستنيه يرجع تانى

ويأنب ضميره

ويجى يعترف بذنبه وغلطه

سيبك بقى من اللى فات وماتشغليش بالك احسن

سادسا :

حاولى تشغلى بالك بحاجة مفيدة لكِ انتِ

مش عشان يعرف انك بقيتى ناجحه لاء

عشان نفسك وبس

صدقينى لو مشغوله طول الوقت

وعندك هدف فى الحياة مش هيجى على بالك الماضى اللى احيانا

ومافيش داعى انك تحاولى ترفعى من نفسك بس عشان يعرف انك بقيتى حاجة كبيرة لا بالطريقه دى هتفضلى فكراه , لالالالا عشان نفسك وبس

سابعا :

ودى اهم حاجة وهى الحاجة اللى هتغير مجرى تفكيرك تماما وتوجه

بوصلة عقلك ناحية الصواب والخير هى ...

القرب من الله  سبحانه وتعالى هو الاعلم بقلوب عباده وصدقينى

لو قربتى من ربنا وطلبتى منه انه يقرب منك الخير ويبعد عنك الشر

وكمان طلبتى منه انه يشيل من عقلك التفكير فى حاجة مافهاش خير لكى

هيحصل وهتلاقى نفسك ربنا نور بصيرتك وشايفه الموضوع صح

وشفتى كل حاجه على حقيقتها  ومش هتحسى بالحنين او الشوق لحد

اصلا ماكنش فيه الخير

اصله لو خير كان ربنا حافظ عليه عشان يسعدك

لكن طالما ان ربنا صرفه عنك بطريقه او باخرى

يبقى مافيش فيه خير

واللى ربنا شايفه هو الصح اكيد

ثامنا :

لو لسه عايشه الوهم انه بيتعذب فى بعدك عشان خاطر مصلحتك

وانه اكيد بيحن لكى وفكرك دايما

وانه هيكون سعيد لو احتجتى حاجة ولجئتى له زى ما قالك فى النهاية العاطفيه اياها .. انتِ ممكن تجربى تكلميه  تانى وساعتها هتتاكدى وتقطعى الشك باليقين

ولما تصدمى بطريقة كلامه البرده ويحسسك انه ماكنش له لزوم اتصالك بيه ويرد عليكى وهو مضايق اوى اوى وبطريقه جافه كانه مايعرفكيش اصلا ساعتها هتتاكدى انك بتحنى وبتشتاقى لحد انتِ مش على باله اصلا ...

وعشان كدا حاولى تتناسى ....

لحد ما ربنا ينور بصيرتك وتشوفى حقيقة الاحساس اللى كنتى عيشاه

وحقيقة البنى ادم اللى كنتى حباه وبلاش غرورك يهىء لك انه سابك وبعد عنك

لان فى ظروف قهريه هى اللى دفعته انه يبعد عنك وبلاش خيالك يهيىء لك ان الظروف دى قهرية جداا لدرجة انه مايقدرش يقولهالك لان كل دا خيال فى خيال

اسلوبه العاطفى فى النهاية إياها هو اللى اعطاكِ ايحاء بكدا .

إيمى الاشقر 
للتواصل من خلال الفيسبوك  
https://www.facebook.com/emy.alashkar